Geguritan

Ngelmu Nyata

Pitik jago bengak-bengok ngumbar swara

Adzan Subuh nggugah manungsa

Aku tangi nyingkap kemul

Nggebyur awak, ngisi weteng, nglakokake sikil

Labuh ana ngendi lakuku ?

Aku menyang gedhung ijo

Gedhung panggonan sinauku

Ing gedhung ijo, dak adhep buku

Jarene, buku iku sumbering ngelmu

Kudune ora ndadekake ngelu

Ing gedhung ijoku, dak rungokake pitutur guru

Dak lakoni tugas saka guruku

Nanging dadi kumat ngeluku

Nalika kabeh guru panutanku maringi amanat tugas kanggoku

Iki tanggungane para pangadhep buku

Nyinau sumbering ngelmu, nggugu pitutur guru

Lumaku sangu ngelmu, nyinau lelakonan urip donya

Apa piguna ngelmu tanpa lelakonan ing kahuripan nyata

Para pangadhep buku bisa tanpa daya

Nalika ora nyinau apa kuwi urip donya

Urip ing donya butuh ngelmu nyata

Ngelmu buku ora ana apa-apa

Menawa ora bareng ngelmu nyata